Граѓаните останаа без акциските попусти поради „Новогодишната кошничка “

Со мерката „Новогодишна кошничка“ Владата му дозволи на бизнисот самостојно да ја состави „новогодишната кошница“ со прехранбени производи, со намалување на цените од 10%. Иако ова изгледа како позитивен потег за потрошувачите, фактички, мерката им даде можност на трговците да ги покачат цените и да ја искористат ситуацијата за остварување на поголем профит. Како последица, потрошувачите ќе бидат лишени од вообичаените новогодишни промоции и акциски попусти, кои во минатото достигнуваа и до 40% попусти за одредени производи.

Акцијата „Моја кошница“ трае од 15 декември до 15 јануари, а претставници од маркетите велат дека не се очекуваат дополнителни акции, какви што традиционално се организираат за Нова година, со намалени цени на производи кои често ги красат новогодишните трпези.

На пример, кашкавалот „гауда“ во еден супермаркет во Скопје бил намален од 459 на 359 денари во ноември, но по завршувањето на акцијата цената се зголемила на 469 денари. Овој продукт, иако е популарен и често купуван, не е вклучен во „новогодишната кошница“, иако се очекуваше да биде дел од попустите за празниците.

Иако некои производи се намалени во рамки на акцијата, основни прехранбени производи како зејтин, шеќер, јајца и млечни производи не се опфатени со попустите. Ова значи дека граѓаните ќе останат без значајни намалувања кои традиционално ги користат за подготовка на новогодишната трпеза, додека бизнисот ќе продолжи да добива поголеми приходи од повисоките цени.

Оваа ситуација ја става во прашање вистинската корист за потрошувачите, додека бизнисите може да остварат повеќе профит без да имаат реални бенефити за крајниот потрошувач.