Во Газа загинаа 77 луѓе откако беше договорен прекин на огнот во Газа, Израел го одложи одобрувањето на договорот

Израел соопшти дека го одложил одржувањето на состанокот на владата во четвртокот за да го ратификува примирјето со Хамас, обвинувајќи ја милитантната група за тоа, додека, во меѓувреме, палестинските власти соопштија дека во израелските воздушни напади во текот на ноќта загинале 77 луѓе во Газа, јави Ројтерс.

Високиот функционер на Хамас, Изат ел-Решик, рече дека групата останува посветена на договорот за прекин на огнот, договорен ден претходно, кој требаше да стапи на сила од недела за да се стави крај на 15-месечното крвопролевање.

Претставникот на претседателот Џо Бајден, Брет Мекгурк и пратеникот на новоизбраниот претседател Доналд Трамп, Стив Виткоф, беа во Доха со египетските и катарските посредници кои работат на решавање на последниот преостанат спор, изјави американски официјален претставник, кој сакаше да остане анонимен.

Комплексниот договор за прекин на огнот се донесе во средата по посредство на Катар, Египет и САД за да запре војната што ја опустоши крајбрежната територија и го разгоре Блискиот Исток.

Договорот предвидува шестнеделен првичен прекин на огнот со постепено повлекување на израелските сили од Појасот Газа, каде што загинаа десетици илјади. Заложниците земени од милитантната група Хамас, која ја контролира енклавата, ќе бидат ослободени во замена за палестинските затвореници притворени во Израел.

Договорот, исто така, го отвора патот за влез на хуманитарната помош за Газа, каде што мнозинството од населението е раселено и се соочува со акутен недостиг на храна, предупредија експертите на крајот на минатата година.

Редици камиони со хуманитарна помош беа наредени во египетскиот пограничен град Ел-Ариш кои чекаа да преминат во Газа, откако границата повторно ќе биде отворена.

Прифаќањето на договорот од страна на Израел нема да биде официјално додека не биде одобрен од кабинетот и владата за безбедност на земјата, а гласањето беше закажано за денес.

Израелскиот премиер Бенјамин Нетанјаху го одложи состанокот, обвинувајќи го Хамас дека во последен момент поставува барања и се враќа на точки од пред договорот.

„Израелскиот кабинет нема да се состане додека посредниците не го известат Израел дека Хамас ги прифатил сите елементи од договорот“, се вели во соопштението од канцеларијата на Нетанјаху.

Тврдокорните во владата на Нетанјаху се надеваа дека ќе го спречат договорот, иако се очекуваше мнозинството министри да го поддржат.

Религиозната ционистичка партија на министерот за финансии Безалел Смотрич во соопштение рече дека нејзиниот услов за останување во владата ќе биде враќање на борбите на крајот од првата фаза од договорот, со цел да се уништи Хамас и да се вратат сите заложници. Екстремно десничарскиот министер за полиција Итамар Бен-Гвир, исто така, се закани дека ќе ја напушти владата доколку се одобри прекинот на огнот.