Ревизијата на ДЗР констатира: Останува дупката во ПИОМ

Државниот завод за ревизија (ДЗР) изврши ревизија на финансиските извештаи на Фондот за пензиско и инвалидското осигурување за 2023 година, при што е утврдено неповолно мислење за вистинитоста и објективноста на финансиската состојба. Идентификувани се слабости во спроведувањето на јавните набавки, пописот на средства и внатрешните контроли. Иако има зголемување на приходите, тие не се доволни за покривање на растечките трошоци за социјални бенефиции, што резултира со континуиран дефицит. 

Според ревизорите, наплатените придонеси од плата на Фондот и во 2023 година не се доволни за покривање на дефицитот од 33 отсто за исплата на пензии.  Приходите од наплатен придонес од плата за пензиско и инвалидско осигурување во 2023 година се зголемени за 13 отсто во однос на претходната 2022 година и изнесуваат над 63 милијарди денари со учество од 65,74 отсто во вкупно остварените приходи. Но, оствареното зголемување на приходите во 2023 година и понатаму не е доволно за покривање на расходите за социјални бенефиции кои исто така секоја година бележат растат.

Во декември 2023 година бројот на осигурениците изнесува 573.372 лица додека бројот на пензионери изнесува 337.814 лица односно соодносот пензионери/осигуреници изнесува 1:1,70 и бележи мало намалување во однос на 2022 година кога изнесувал 1:1,71. 

Резизијата открила и дека дел од извршителите директно повлекувале парични средства од сметката на Фондот, за пензионери коишто имаат долгови. Во деловните книги по овој основ во 2023 година евидентирани се одлив на средства кон 18 извршители во износ од над четири милиони денари, што е помалку во однос на 2022 година кога се евидентирани повлекувања во висина од речиси 5,5 милиони денари. Во 2023 година месечно се регистрирани од 2.500 до 3.000 трансакции од пензии на должници кон сметки на извршителите, а на годишно ниво оваа бројка достигнува околу 30.000 трансакции.