Зеленски: Би разговарал со Путин откако ќе имаме заеднички план со Трамп и Европа

Украинскиот претседател Володимир Зеленски изјави во петокот во Минхен дека ќе разговара со рускиот лидер Владимир Путин само откако ќе се договори за заеднички план за ставање крај на војната со американските и европските сојузници.

„Ќе се сретнам само со еден Русин, Путин, и само кога ќе се договориме за заеднички план со Трамп и Европа. Тогаш ќе седнеме и ќе ја прекинеме војната. Подготвен сум да се сретнам само во тој случај“, рече Зеленски на прес-конференција на маргините на безбедносната конференција.

Запрашан каков е неговиот однос со Трамп, тој рече дека републиканскиот претседател му го дал својот приватен телефонски број.

„Ми беше смешно…ми рече дека можам да му се јавам кога сакам. Му се заблагодарив и го потсетив дека ми го кажа тоа минатиот пат, но не ми го даде неговиот број. Тој ми одговори, во ред, можеш да ми се јавиш кога сакаш“, го раскажа Зеленски разговорот со Трамп.

Трамп ги вознемири сојузниците пред неколку дена кога разговараше со рускиот лидер Владимир Путин и најави почеток на преговорите.

Зеленски инсистира на тоа дека САД, Европа и Украина мора да имаат заеднички став пред да разговараат со Москва, а Европската унија го предупреди Вашингтон дека не може да се постигне договор со Путин надвор од стариот континент.

Контурите на идниот мировен план може да се видат во текот на викендот во Минхен, по средбата на Зеленски со американскиот потпретседател Џеј-Ди Венс. Зеленски рече дека е подготвен да разговара за сè, од распоредувањето на мировните сили до односите со НАТО.

Но, црвената линија е признавањето на руската анексија на делови од Украина, тоа е запишано во украинскиот устав и само украинскиот народ може да одлучи за промена на границите, посочи тој.