Skip to content
Илјадници граѓани и климатски активисти денеска излегоа на протестен марш во турскиот град Анталија, додека преговорите на конференцијата на Обединетите нации за климата (КОП31) стигнаа до својата половина. Демонстрантите побараа климатска правда, стопирање на еколошкото уништување и конкретни одлуки за напуштање на фосилните горива.
Протестот се одржа на шестиот ден од самитот КОП31, во момент кога министрите за животна средина и клима од државите членки пристигнуваат во Анталија за да ја преземат политичката фаза од преговорите. Во првата недела од конференцијата техничките тимови постигнаа ограничен напредок за клучните прашања, вклучувајќи го финансирањето на климатската транзиција и намалувањето на емисиите на стакленички гасови.
Паралелно со официјалните преговори на Обединетите нации, еколошките организации, синдикатите и граѓанските движења го отворија таканаречениот „Народен климатски самит“, кој ќе трае од 14 до 18 ноември. Според организаторите, меѓу кои се меѓународната мрежа Пријатели на Земјата (Friends of the Earth International) и локални еколошки здруженија од Анталија, целта на алтернативниот собир е да се слушне гласот на заедниците директно погодени од климатските промени и индустриското загадување.
Учесниците на маршот поминаа по централните улици на Анталија носејќи транспаренти со барања за заштита на природата и одговорност од големите загадувачи. Дел од критиките на демонстрантите беа насочени кон корпоративното влијание врз климатските преговори и конкретни индустриски компании, меѓу кои и градежниот гигант Холцим (Holcim), поради емисиите на јаглерод диоксид во производството на цемент.
Конференцијата КОП31 во Анталија е триесет и прво годишно заседание на потписничките на Рамковната конвенција на Обединетите нации за климатски промени. Втората недела од самитот традиционално е посветена на министерски состаноци на високо ниво, на кои треба да се усогласи завршниот документ и обврските на државите за справување со глобалното затоплување.
