Трамп: Нуклеарното оружје е „монструм“ што може да го уништи светот

Американскиот претседател Доналд Трамп повторно ја истакна опасноста од нуклеарното оружје, нарекувајќи го „монструм“ што може да доведе до крај на светот.

Во интервју за „Фокс“, Трамп ја изрази својата загриженост за залихите на атомско оружје и нагласи дека човештвото мора да најде начин да се ослободи од него.

„Различни земји седат на залихи од нешто што се нарекува атомско оружје, но тоа всушност се огромни монструми што можат да предизвикаат невидено уништување“, изјави Трамп.

Тој исто така ја критикуваше огромната финансиска потрошувачка за одржување на нуклеарниот арсенал, велејќи дека е разочаран што САД вложуваат милијарди долари во нешто што носи глобална опасност.

Во реакција на изјавата на Трамп, Кремљ изрази подготвеност за дијалог со Вашингтон за намалување на нуклеарните закани. Портпаролот на рускиот претседател, Дмитриј Песков, изјави дека е неопходно двете сили да разговараат за стратешка стабилност и контрола на оружјето.

Дополнително, Песков истакна дека Москва се согласува со изјавата на американскиот државен секретар Марко Рубио дека војната во Украина е прокси-конфликт меѓу две нуклеарни сили, кој мора да биде запрен за да се избегне ескалација.