Истекоа 82.000 литри нафта во Дунав – Србија се соочува со потенцијална еколошка катастрофа

Во утринските часови на 21 април, околу 07:00 часот, при утовар на нафта од рафинеријата во Панчево во шлеп на компанијата „Нафтахем“ во Нови Сад, во реката Дунав се излеале приближно 82.000 литри нафта, соопшти Основното јавно обвинителство.

Веднаш по инцидентот, на терен излегол дежурен обвинител заедно со полицијата од СВ Панчево, придружувани од инспектори за заштита на животната средина, инспектори за безбедност на пловидбата и надлежен инспектор за транспорт на опасни материи.

Институтот за јавно здравје земал мостри од водата во регионот каде што се случило истекувањето, со цел да го утврди степенот на загадување. Надлежните институции преземаат понатамошни мерки и работат на утврдување на причините за инцидентот.

Се очекуваат дополнителни информации во наредните денови, додека јавноста и еколошките организации со загриженост го следат развојот на настаните, стравувајќи од сериозни последици по животната средина во поширокиот регион на Дунав.