Skip to content
Во координирана меѓународна операција, романската и британската полиција, со поддршка од Евроџаст и Европол, разбија криминална мрежа која со години експлоатирала млади девојки, претежно од Романија, принудувајќи ги на проституција на територијата на Велика Британија.
Рации биле изведени на 40 локации во двете земји, при што се идентификувани 12 осомничени и спасени најмалку 27 млади жени, кои биле пренесени на безбедно место.
Според истрагата, од 2019 година, криминалната група таргетирала девојки од социјално ранливи средини – особено оние сместени во институции за згрижување деца во Букурешт и регионот Прахова. Тие користеле т.н. „lover boy“ метод – заведувајќи ги жртвите со ветувања за љубов и подобра иднина, често во угостителскиот или туристичкиот сектор. Наместо тоа, девојките биле лишени од документите, изолирани и присилени да се занимаваат со проституција.
Проценките покажуваат дека мрежата на овој начин остварила приходи до 5,3 милиони евра. Покрај сексуалната експлоатација, осомничените биле вклучени и во перење пари, како и обезбедување на транспорт и сместување за жртвите во Велика Британија.
Од Евроџаст ја поздравија акцијата, нарекувајќи ја пример за тоа како „организираниот криминал го монетизира човечкото страдање“. Во соопштението се истакнува дека трговијата со луѓе и понатаму претставува сериозна закана за Европа, а клучниот фактор за успехот во борбата против оваа појава е меѓународната соработка.
„Вистинската борба за жртвите штотуку започнува. Сега им е потребна психолошка и социјална поддршка за повторно да ја преземат контролата врз сопствениот живот“, стои во соопштението.