Апокалиптични слики од Турција: Пожар проголтува сè пред себе, во тек е масовна евакуација

Сцени со библиски размери се снимени на северозападот од Турција, каде што беснее неконтролиран пожар во покраината Бурса, загрозувајќи ги населбите, затворајќи ги главните патишта и поттикнувајќи итна мобилизација на надлежните служби. Снимките што кружат низ целиот свет потсетуваат на апокалипсата – небото е поцрнето од чад, а огнот се шири неконтролирано кон населените места.

Пожарот избувна во саботата попладне во областите Кестел и Гурсу и се прошири многу брзо поради силните ветрови и сушата. За само неколку часа, илјадници хектари шумска површина беа претворени во пепел, уништувајќи едно од најважните природни живеалишта во регионот. Пламените јазици опасно се приближија до автопатот Бурса-Анкара, што доведе до прекин на сообраќајот, а на многу места видливоста беше намалена на нула поради густиот чад.

Властите веднаш наредија евакуација на селото Карахидир и околните населби, бидејќи пожарот се приближил опасно до станбени згради и индустриски постројки. Очевидци велат дека во каменоломите се слушнале експлозии, што предизвикало паника и ја забрзало евакуацијата на жителите.

Повеќе од 1.300 луѓе веќе се евакуирани, додека десетици противпожарни возила, воздухопловни единици и волонтери се тркаат со времето за да го локализираат пожарот. Заедно со пожарникарите се и локални земјоделци со приватни машини, обидувајќи се да изградат противпожарни појаси.

Владата внимателно го следи развојот на катастрофата, а веќе е започната истрага за причините за пожарот. Прелиминарните проценки укажуваат на можна човечка невнимание, но не се исклучуваат и други можности, објавува „Прототема“.