Skip to content
Реакција со остар тон дојде по вчерашната изјава на премиерот Христијан Мицкоски, кој најави дека „голем светски бренд“ ќе ја откупува струјата од идниот ветерен парк на „Алказар Енерџи“. Во отворено писмо, од иницијативата што ја следи изградбата на проектот оценуваат дека Владата ги „помешала приоритетите“: природниот ресурс — македонскиот ветер — наместо да ги стабилизира домашните сметки, ќе го зголемува профитот на приватен инвеститор и на странска корпорација.
Според соопштението, Владата „се фали“ со модел во кој националните добра се ставаат во служба на туѓи бизниси, додека граѓаните остануваат неми набљудувачи на скапи фактури за струја. „Дали Македонија ќе стане евтина енергетска платформа за богатите западни пазари?“ прашуваат авторите, потсетувајќи дека сонцето и ветерот мора да донесат директна корист за домаќинствата и за македонското стопанство.
Најава што требало да биде триумф, велат тие, отвора сериозни дилеми: ќе паднат ли цените на струјата за семејните буџети, или ќе се продлабочи енергетската неизвесност? Зошто нема механизам што гарантира прво снабдување на домашниот пазар по поволни тарифи?
Дополнително, иницијативата го предизвикува премиерот да открие дали проектот воопшто има правосилно одобрение за градење. Јавната расправа по урбанистичкиот план заврши на 2 јуни 2025 година, нагласуваат потписниците, а законските рокови за разгледување забелешки, усвојување план, поднесување барање и издавање дозвола не можат „магично“ да се скратат на неколку недели. Затоа бараат:
- објавување на целосното одобрение за градба (доколку постои) со сите прилози;
- јасно образложение од институцијата што го издала, со детална временска линија на постапката.
„Сѐ друго е распродажба на националните ресурси и работа директно против интересите на народот“, се наведува во заклучокот на реакцијата, со апел енергетските стратегии да го имаат јавниот интерес како врвен приоритет.
