Научници предупредуваат дека администрацијата на Трамп искривува научни податоци за да укине клучни климатски заштити

Два извештаи на администрацијата на Доналд Трамп, наменети за укинување на долгогодишниот заклучок дека климатските промени претставуваат закана по јавното здравје и благосостојба, се исполнети со грешки, пристрасност и погрешни интерпретации, предупредуваат десетици научници кои одговориле на анкета на Асошиетед прес.

Во документите, меѓу другото, се тврди дека топењето на мразот во Арктикот е мало, но се користат податоци од Антарктикот за поткрепа на таа теза. Се наведува и француска студија за климатски штети врз земјоделството за да се извлечат заклучоци за САД – нешто што самиот автор на студијата го оспорил поради големите разлики во климата и земјоделските системи.

Исто така, во извештаите се користат застарени статистики за шумски пожари кои претходно се оценети како ненадежни, при што со графикон се прикажува дека пожарите биле полоши пред еден век отколку денес.

Од 64 научници кои одговориле на прашањата на АП, дури 53 дале негативна оценка за документите на Агенцијата за заштита на животната средина (ЕПА) и на Министерството за енергија. Некои од нив рекоа дека нивните истражувања биле погрешно употребени, извадени од контекст или искривени.

„Работата и заклучоците изгледаат пристрасни. Податоците и графиконите користат класични техники на дезинформација“, изјави Џенифер Марлон од Јејл програмата за климатска комуникација.

Администрацијата на Трамп во јули предложи укинување на т.н. „endangerment finding“ од 2009 година – клучен документ што утврдува дека климатските промени претставуваат закана по здравјето и јавниот интерес. Укинувањето би отворило пат за укинување или слабеење на регулативите за емисии од автомобили, електрани на јаглен и гасни постројки.

Научната заедница, пак, предупредува дека ваквите потези ќе доведат до сериозни последици врз животната средина и ќе поткопаат децениски напори за намалување на загадувањето. Дел од експертите изјавија дека документите на администрацијата претставуваат класичен пример на „cherry-picking“ – селективно избирање податоци со цел да се минимизира заканата од климатските промени.

Јавноста има рок до 2 септември за коментари на извештајот на Министерството за енергија, а до 22 септември за предлогот на ЕПА. Потоа администрацијата ќе треба да ја донесе конечната одлука.

Еколошките организации веќе најавија судски постапки против обидите за укинување на клучните климатски заштити.