Американска научничка развива лек за продолжување на животот на кучињата

Кучињата, и покрај нивната посветеност и љубов кон луѓето, ретко живеат доволно долго. Лабрадорите можат да достигнат и до 14 години, но кај поголемите раси, како бернските планински кучиња, животниот век често завршува веќе по девет години. Научничката Селин Халуа верува дека милениците заслужуваат повеќе време, па затоа го посветила своето истражување на развој на лекови кои го забавуваат процесот на стареење кај кучињата.

Првиот ваков препарат, со вкус на говедско месо, би можел да се појави на пазарот до 2026 година. Тој таргетира метаболички и хормонални нерамнотежи пред да преминат во болести и потенцијално може да го продолжи животниот век на кучињата. Халуа веќе ги започна преговорите со американската ФДА, а преку специјална програма за условно одобрување очекува нејзиниот прв лек да биде достапен за постари миленици.

Компанијата „Лојал“, која таа ја основа, собра над 135 милиони долари инвестиции и веќе е проценета на 425 милиони долари. Само во САД живеат речиси 90 милиони кучиња, што ја прави оваа иновација потенцијално револуционерна.

Иако засега фокусот е на животните, Халуа не ја исклучува можноста еден ден слични терапии да се применат и кај луѓето. Сепак, тоа е многу посложен и поскап процес кој би чинел милијарди и би траел повеќе од една деценија.

Со ваквите проекти, „Лојал“ ја освои и довербата на „Форбс“, кој ја вклучи компанијата на листата на стартапи со најголем потенцијал за достигнување вредност од една милијарда долари. Халуа, инаку поранешна докторка на науки на Оксфорд и дел од престижната листа „30 под 30“ на „Форбс“, е уверена дека новите терапии ќе им овозможат на милиони сопственици да им подарат на своите кучиња неколку драгоцени години повеќе.