Почина легендарниот дизајнер Џорџо Армани

Џорџо Армани, модниот дизајнер кој засекогаш го промени начинот на кој светот ја гледа елеганцијата, почина на 91-годишна возраст. Групацијата „Армани“ ја потврди веста за неговата смрт.

Армани починал мирно, опкружен со своето најблиско семејство. До последниот момент остана активен во работата, посветен на брендот што го изгради и кој веќе пет децении го дефинира духот на современата италијанска мода.

Неговата кариера почна скромно – како продавач, а подоцна и како дизајнер кој не се плаши да ги крши модните правила. Неговата визија за „тиха елеганција“ го направи омилен меѓу политичари, холивудски ѕвезди и јавни личности ширум светот.

„Во текот на годините, Армани создаде свет кој надминува мода – тој градел култура, стил на живеење и вредности кои ја одразуваат суштината на времето“, стои во официјалното соопштение на неговата компанија. „Со исклучителна прецизност, суптилност и разбирање за луѓето, тој создаде јазик што допира до секого.“

Џорџо Армани беше познат и по својата хуманост. Во текот на пандемијата донираше милионски суми на здравствени институции, покажувајќи дека модата за него никогаш не била само естетика – туку одговорност.

Останува запаметен како фигура која никогаш не се потчини на трендовите, туку сам ги поставуваше. Со својот ненаметлив, но моќен стил, остави белег што ќе живее долго по него.

Компанијата „Армани“, иако без својот основач, продолжува да живее како огледало на неговите вредности – независност, интегритет и визија за убаво, достоинствено секојдневие.