Skip to content
Моќната бура „Барбара“ што ја зафати Романија во вторникот вечерта и рано утрово предизвика сериозни оштетувања и нарушувања во секојдневниот живот на граѓаните.
Поради екстремните временски услови, во повеќе градови беа поплавени улици и згради, дрвја паднаа врз електрични кабли, а канализациските системи беа блокирани. Јавниот превоз беше привремено запрен, а наставата во училиштата е откажана.
Најтешка ситуација беше забележана во округот Констанца, каде што надојдената вода однесе автомобил. Еден маж успеал да се качи на хаубата и да почека спасување, по што бил пренесен во болница со симптоми на хипотермија. Интервентните екипи цела ноќ работеле на евакуација и расчистување на теренот.
„Поради силниот дожд и ветер, водата го однесе автомобилот, а патникот се засолни на хаубата. Спасувачките тимови извлекоа уште две лица кои се нашле заробени на покривот од возило“, соопштија локалните власти.
Како мерка на претпазливост, градските власти во Констанца утрово го прекинаа автобускиот сообраќај за да им овозможат непречена работа на екипите на терен.
Поради невремето, денеска е откажана наставата за повеќе од 109.000 ученици во 205 училишта во регионот Констанца.
Циклонот што ја погоди земјата го носи името „Барбара“ и, според метеоролозите, може да предизвика дополнителни врнежи и пороен ветер и во наредните денови.