Skip to content
По паузата заради локалните избори, претседателот на Собранието Африм Гаши денеска (4 ноември 2025) одржа координација со координаторите на пратеничките групи и најави дека ќе се работи на нов Изборен законик – или на темелни измени – донесени со политички консензус. „Нов Изборен законик“ е потребен, рече Гаши, и поради финансирањето на партиите: моделот пропишан во 2021 година не ја одразува актуелната конфигурација, па ќе се отвори пакет во кој, покрај парите за кампањите, може да се разгледува и промената на изборниот систем – вклучително и опцијата Македонија да стане една изборна единица.
Мандатот за реформа, според спикерот, опфаќа и прашања што редовно создаваат проблеми во изборните циклуси: препораките на ОБСЕ/ОДИХР, правилата за предвремена кампања, кандидатурата на независни листи, цензусите, како и техничките процедури за спроведување и контрола на кампањите. Целта, како што рече, е системско надминување на сите забележани слабости – без разлика дали станува збор за парламентарни, претседателски или локални избори.
Кривичниот законик не бил тема на денешната координација. Гаши појасни дека „вратата е отворена“ за измените што ги бара Управниот суд во деловите што се толкуваат како амнестија за корупција, но дека за да стигне текст во собраниска процедура потребно е Министерството за правда и Владата да го достават предлогот. Потсети дека летово беше најавено брзо пристигнување на новиот Предлог-кривичен законик, но до денеска тој не е формално поднесен.
Отворено останува и прашањето за повторените локални избори во Гостивар, Центар Жупа, Врапчиште и Маврово-Ростуше, каде во првиот круг не беше постигнат потребниот цензус. Гаши најави консултации со Државната изборна комисија за да се расчисти од кога точно течат роковите – од конечноста на резултатите по првиот круг или по вториот. Во меѓувреме, на 15 јануари 2026 истекува мандатот на актуелниот состав на ДИК; согласно законската формулација „до избор на нов член“, постојниот состав ќе продолжи да ја извршува функцијата сè додека не завршат повторените избори и не се избере нов состав.
Спикерот најави и повторно отворање на Законот за локална самоуправа, кој пред изборите заглави без Бадентерово мнозинство. Не е извесно дали ќе се задржи одредбата „стапува во сила на следните локални избори“, која, според критичарите, де факто би ги штитела актуелните градоначалници; исходот ќе зависи од волјата на пратеничките групи. За отворање на Уставот засега нема најави, и покрај мислењата на Венецијанската комисија за поголема независност на Јавното обвинителство.
Гаши информираше и дека Предлог-буџетот за 2026 година е пристигнат во Собранието и дека на пленарна седница ќе се најде на 9 декември. Овластените предлагачи ќе може да поднесуваат амандмани до 10 ноември.
