Skip to content
Американскиот претседател Доналд Трамп потпиша извршна наредба со која значително се намалуваат или целосно се укинуваат царините за широк спектар прехранбени производи – од кафе и банани, до говедско месо, авокадо и домати.
Одлуката доаѓа во момент кога неговата администрација се соочува со растечки политички притисок поради зголемените трошоци за живот, особено по слабите резултати на Републиканската партија на изборите минатата недела.
Производи што не се произведуваат во доволни количества во САД
Белата куќа соопшти дека на листата за ослободување од царини има над 100 производи кои, според администрацијата, не може да се обезбедат во доволни количини во домашното производство.
Овие исклучоци претставуваат делумно повлекување од политиката на генерални царини – моментално основните царини на увоз изнесуваат 10%, со дополнителни давачки кон одредени трговски партнери.
Трамп долго тврдеше дека неговите царини нема да предизвикаат поскапување за американските потрошувачи и дека зборувањето за „прифатливост“ е измислица на демократите. Но, растечките цени на намирниците, особено на говедското, станаа сериозен политички проблем за него.
Минатата недела тој повика на истрага за индустријата за преработка на месо, обвинувајќи ги компаниите за „нелегално договарање, манипулација со цените и фиксирање на пазарот“.
Повлекување на царини за да се намалат цените
Укинувањето на царините, според Трамп, се однесува на производи кои САД не ги произведуваат, „па затоа нема потреба да се штитат домашните индустрии“.
„Направивме мало повлекување на некои давачки за храна, како што е кафето. Цената беше превисока, а наскоро ќе биде значително пониска,“ изјави Трамп.
Иако економистите одамна предупредуваат дека царините неизбежно се префрлаат врз потрошувачите, администрацијата досега не признаваше директна врска меѓу наметнатите давачки и инфлацијата.
Потрошувачките цени сепак продолжуваат да растат – според извештајот на Министерството за труд, цената на намирниците е повисока за 2,7% во однос на лани.
Исплатата на „царински чекови“ сè уште во правна неизвесност
Трамп се обидува да ја засили поддршката за царините со најавените „царински чекови“ од 2000 долари за Американците, иако Врховниот суд сè уште ја разгледува законитоста на тој потег.
Новите исклучоци од царините стапија на сила ретроактивно од полноќ на 13 ноември.
Договори со Латинска Америка и намалување на цените на кафе и банани
Како дополнителна мерка за намалување на трошоците за храна, администрацијата соопшти дека даноците на увоз на кафе и банани ќе се намалат и како дел од новите трговски договори со четири латиноамерикански држави.
Оваа недела Трамп и министерот за финансии Скот Бесент ветија дека цената на кафето во САД ќе биде намалена за 20% до крајот на годината.
Производи што повеќе нема да се царинат
На листата на Белата куќа има над 100 категории производи, меѓу кои:
- кафе, какао, црн и зелен чај
- ванила
- различни видови говедско месо
- овошје: авокадо, банани, кокоси, манго, ананас, лимети, гуава, домати, пиперки
- зачини: цимет, ѓумбир, шафран, кардамон, куркума, кориандер, ким…
- јаткасти плодови, семиња и коренести производи како кашу, макадамија, тапиока, таро, вода костени и др.
Со оваа одлука, администрацијата се надева дека ќе го ублажи растот на цените во продавниците – еден од најсилните адути на демократите и најголем политички предизвик за Трамп.
Извор: BBC
