Јаневска не се премислува за загадениот воздух: Нема да има предвремен распуст

И покрај деновите со магла и екстремно високи концентрации на ПМ-честички во Скопје, Министерството за образование и наука нема да го скрати првото полугодие и учениците ќе одат на настава до крајот на месецот, по што следува редовниот зимски распуст.

Министерката за образование и наука Весна Јаневска, одговарајќи на новинарско прашање дали поради загадениот воздух се разгледува предвремено завршување на наставата, порача дека „остануваат уште малку денови до распустот“ и дека „во овој момент немаат информации дека здравјето е загрозено“. Таа додаде дека не е проблем ако учениците, од здравствени причини, отсуствуваат ден или два, нагласувајќи дека лекарите и родителите треба да одлучат кога здравјето е во прашање.

Во истата изјава, Јаневска ја поврза дебатата за загадувањето со поширок проблем што, како што рече, се провлекувал „во минатото“: скратување на училишни денови од причини што немаат врска со здравјето и безбедноста. Посочи дека таквите „негативни појави“ треба да се напуштат и отстрануваат, притоа инсистирајќи дека одлуките секогаш ќе се носат „во корист на нивното здравје“.

Изјавата доаѓа во период кога институциите паралелно активираа механизми за „алармирање“ за загадувањето. Министерството за животна средина информираше дека прагот на алармирање за ПМ10 бил надминат два дена по ред на сите мерни точки во главниот град – Центар, Гази Баба, Карпош, Лисиче и Ректорат – со најкритични вредности во Лисиче. Во вакви услови беа наведени и препорачани мерки: засилени инспекциски контроли, вонредни проверки на техничката исправност на возилата, забрана за горење на отворено, како и препораки до работодавците за ослободување од работни обврски на бремени жени, лица над 60 години и хронично болни, заедно со реорганизација на работата на отворено и избегнување на спортски и културни настани на отворено.

Токму во ваквиот раскорак меѓу „вонредните мерки“ за општата популација и одлуката наставата да продолжи без промени, МОН се обиде да внесе трет елемент: насоки за тоа како училиштата да се снаоѓаат кога воздухот е лош. Министерството објави препораки и „добри практики“ наменети за основните и средните училишта, изработени во соработка со здравствените и еколошките институции, Институтот за јавно здравје, Клиниката за детски болести, академската заедница, како и УНИЦЕФ, УНДП и Канцеларијата на СЗО во Скопје.