Skip to content
Премиерот Христијан Мицкоски порача дека Македонија нема да се откаже од европските преговори и покрај блокадите од Бугарија, нагласувајќи дека неговата задача не е да се занимава со историските спорови, туку да обезбеди иднина за следните генерации. Во обраќањето по повод 23 Октомври, Денот на македонската револуционерна борба, тој ја обвини Софија дека го користи членството во ЕУ за блокирање на Македонија.
„Мојата задача како премиер не е да се занимавам со коски кои припаѓаат на минатото, туку со обезбедување иднина која им припаѓа на нашите деца“, изјави Мицкоски.
Тој рече дека е свесен за разочараноста на граѓаните од долгогодишното чекање за членство во Европската Унија, но оцени дека напуштањето на преговорите не е решение.
„Лесно е да се каже, но така ја отфрламе единствената шанса да влеземе во клубот и да разговараме рамноправно на истата маса“, порача премиерот, осврнувајќи се на повиците Македонија да се откаже од преговарачкиот процес.
Мицкоски тврдеше дека Бугарија почнала да ги користи механизмите на Европската Унија за условување на Македонија откако станала членка на Унијата. Според него, Софија претходно не ги поставувала прашањата за македонскиот идентитет, историјата и положбата на Бугарите во Македонија на начинот на кој тоа го прави денес.
„Влегоа во просторијата каде што не сме ние и од каде што сега ги користат сите механизми да нè закочат“, рече Мицкоски.
Тој нагласи дека Владата ќе продолжи со дијалогот и ќе бара решение преку дипломатија, без откажување од македонските национални интереси.
„На неразумните чекори одговарам со разум, на провокациите со принципи, на притисоците со отпорност и верба во она што сме и што претставуваме“, изјави премиерот.
Во говорот Мицкоски предупреди и на можни обиди за пренесување на политичките тензии од регионот во Македонија. Тој спомена активности на разузнавачки служби и обвини дел од опозицијата дека би можел да учествува во такви сценарија, но не изнесе конкретни докази за овие тврдења.
Премиерот се осврна и на резултатите од работењето на Владата, наведувајќи дека се градат шест автопатски делници, два гасовода и еден далекувод. Според него, повеќе од 90 милиони евра се вложени во образовната инфраструктура, а над половина милијарда евра се распределени за повеќе од 1.200 општински проекти.
Тој тврдеше и дека Македонија има најниска инфлација во Европа и регионот, претставувајќи го тоа како резултат на владините економски политики.
Во завршниот дел од обраќањето, Мицкоски повика на национално единство и истакна дека зачувувањето на македонскиот идентитет, јазик и историско наследство треба да оди паралелно со реформите и европската интеграција.
„Нашето место таму треба да го градиме со реформи, со знаење, со силни институции и со зачувано национално достоинство“, порача Мицкоски.
