Skip to content
Новиот претседател на Државната изборна комисија, Бојан Маричиќ, соопшти дека со денешното давање на свечената заклетва започнува „ново професионално поглавје“ како прв човек на ДИК, најавувајќи целосна посветеност на одговорностите што ги носи функцијата.
Во објавата на Фејсбук, Маричиќ вели дека во мандатот што претстои ДИК ќе продолжи да биде „столб на изборниот процес“, со фокус на законитост, транспарентност и непристрасност. Како приоритети ги посочува развојот на капацитетот на стручната служба, зголемување на довербата кај граѓаните и зајакнување на угледот на институцијата како гарант на демократските вредности и изборните стандарди.
Маричиќ им се заблагодарува на пратениците за довербата, како и на политичката партија што ја поддржала неговата кандидатура. Воедно, упати честитки до „старо-новите“ членови на ДИК за новиот мандат, со порака дека очекува професионален и посветен пристап „во интерес на граѓаните“ и унапредување на демократските принципи.
Објавата доаѓа во период кога се најавуваат и работни групи за Изборниот законик и дебати за моделот на изборна администрација, па јавноста ќе ја мери ДИК и преку тоа дали институцијата ќе испорача предвидливи правила, еднаква примена на процедурите и брза реакција на потенцијални нерегуларности.