Skip to content
„По масовниот руски напад, спасувачките активности продолжуваат во многу од нашите региони. Ова беше комбиниран напад, намерно пресметан да предизвика најголема можна штета на нашиот енергетски сектор“, објави украинскиот претседател Володимир Зеленски денеска.
Неговата изјава дојде по уште една тешка ноќ за Украина, во која Русија нападна со 425 дронови и ракети, вклучувајќи балистички, и нанесе штета во голем број области, убивајќи и ранувајќи цивили.
„Беа користени речиси 400 дронови и 29 ракети од различни видови, вклучувајќи балистички. Значителен број од нив беа соборени, но, за жал, имаше и удари“, напиша Зеленски на денот кога во Женева треба да продолжат трилатералните мировни преговори меѓу САД, Украина и Русија.
Уништување во Одеса
„Десетици илјади луѓе во Одеса се без греење и водоснабдување по нападите“, објави украинскиот претседател. „Сите потребни служби работат на помош. Вкупно беа нападнати 12 региони и, за жал, беа пријавени 9 повредени лица, вклучувајќи деца. Оштетени се повеќе од десет станбени згради и железничка инфраструктура.“
Пријавена е и најмалку една жртва – во Сумиската област, каде што беа повредени уште шест лица.
Во меѓувреме, најголемиот приватен енергетски оператор во Украина – ДТЕК – пријави „исклучително сериозна“ штета како резултат на рускиот удар врз енергетската инфраструктура на Одеса.
„Штетата е исклучително сериозна. Ќе биде потребно долго време за да се врати опремата во регионот во работна состојба. Моментално работиме на терен, расчистувајќи го урнатиот дел. Ќе направиме сè што е можно за да ги отстраниме последиците од ударот што е можно поскоро. Приоритет е да се врати снабдувањето со електрична енергија на критичната инфраструктура“, се вели во соопштението на енергетската компанија.