Skip to content
По повеќе од половина век, НАСА е пред момент што треба да означи враќање на човекот кон Месечината, но овојпат не како носталгично повторување на ерата на „Аполо“, туку како проба за нова лунарна фаза. Мисијата „Артемида 2“ е планирана да полета вечерва од Флорида, со почеток на лансирниот прозорец во 18:24 часот по источноамериканско време, односно во 00:24 часот по полноќ на 2 април по македонско време. Тоа ќе биде прва мисија со човечки екипаж кон Месечината по „Аполо 17“ во 1972 година.
Во капсулата „Орион“ ќе бидат четворица астронаути: Рид Вајсман, Виктор Гловер и Кристина Кох од НАСА, како и Џереми Хансен од Канадската вселенска агенција. Мисијата треба да трае околу 10 дена и да ја однесе екипата околу Месечината и назад кон Земјата, при што ќе се тестираат системите за животна поддршка, навигација и комуникација во длабока вселена.
Најважно е што „Артемида 2“ нема да слета на Месечината. Нејзината задача е да покаже дали САД повторно можат безбедно да испратат луѓе подалеку од ниската орбита на Земјата и да ги проверат клучните системи што подоцна треба да овозможат и вистинско враќање на лунарната површина. Во таа смисла, оваа мисија е тест на технологијата, но и тест на американската амбиција повторно да го задава темпото во новата вселенска трка.
НАСА веќе го почна официјалното одбројување, а според последната прогноза шансите за поволно време за лансирање се околу 80 проценти. Агенцијата предвиде и дополнителни можности за полетување до 6 април, доколку временските или техничките услови вечерва не дозволат безбедно лансирање.