Русија и Кина ставија вето, Ормутскиот теснец останува заложник на војната

Русија и Кина ставија вето на резолуцијата за Ормутскиот теснец, со што Советот за безбедност на ОН не успеа да усвои ни значително ублажен текст што требаше да поттикне координирана заштита на трговската пловидба низ еден од најважните енергетски премини во светот. Гласањето заврши со 11 земји „за“, две „против“ и две воздржани, само неколку часа пред рокот што Доналд Трамп му го постави на Иран да го отвори теснецот или да се соочи со нови удари врз инфраструктурата. Ормутскиот теснец, низ кој вообичаено минува околу една петтина од светската нафта, и натаму останува затворен во сенката на војната и на сè поотворената пресметка меѓу големите сили.

Текстот што падна на вето веќе бил далеку помек од првичната верзија. Првичниот предлог на Бахреин содржел формулација што ќе овозможела употреба на „сите неопходни средства“, односно јазик што во практиката на ОН може да отвори простор и за воена акција. По противењето од Кина, а потоа и од други постојани членки, резолуцијата била сведена на повик државите да координираат одбранбени мерки, вклучително и придружба на трговски бродови, но и тоа не беше доволно за да помине.

Русија и Кина тврдат дека текстот бил пристрасен кон Иран и дека во ваков момент испраќал погрешна политичка порака, додека Вашингтон ветото го претстави како отворено попуштање пред Техеран. Американскиот амбасадор во ОН, Мајк Волц, ги обвини Москва и Пекинг дека застанале на страната на режим што ја држи глобалната економија како заложник, а Франција оцени дека намерата на текстот била исклучиво одбранбена и насочена кон безбедноста на пловидбата, без дополнителна ескалација. Иран, пак, го поздрави ветото и оцени дека со него е спречен обид Советот за безбедност да се искористи за легитимирање на агресија.

Пошироката слика е уште понепријатна: дури и кога резолуцијата беше сведена на минимален дипломатски текст, Ормут остана непремостлива линија на поделба меѓу Западот од една и Русија и Кина од друга страна. Тоа значи дека кризата околу теснецот веќе не е само спор за поморска безбедност, туку и нов доказ дека војната со Иран ја блокира не само трговијата, туку и капацитетот на Обединетите нации да произведат каков било заеднички одговор.