Skip to content
Стефано Габана се повлече од функцијата претседател на модната куќа што ја основаше заедно со Доменико Долче. Неговата оставка од надзорните функции стапила на сила на 1 јануари, соопшти компанијата, пренесуваат странски медиуми.
Компанијата овој потег го опиша како „природна еволуција на организациската структура и менаџментот“, додавајќи дека 63-годишниот Габана ќе продолжи да ја извршува својата креативна улога.
Тој беше присутен и на последната модна ревија во февруари, каде што меѓу гостите беше и Мадона. По ревијата, тој и Долче ја пречекале пејачката и ја придружиле зад сцената.
Според „Business of Fashion“, Габана размислува за иднината на својот удел од 40% во компанијата. Во меѓувреме, братот на Доменико Долче, Алфонсо Долче, ја презел претседателската функција, додека поранешниот извршен директор на „Гучи“, Стефано Кантино, се споменува како можен висок менаџер. Компанијата наводно се подготвува и за нови преговори со кредиторите.
Иако повлекувањето не е поврзано со скандал, брендот и неговите основачи низ годините се соочуваа со критики за расизам и хомофобија. Во 2018 година, компанијата мораше да откаже ревија во Кина по контроверзно промотивно видео, а потоа Габана се најде под критики по објави на социјалните мрежи, кои подоцна ги негираше како резултат на хакирање.
И во поново време, брендот беше критикуван за недоволна различност на модели на модните ревии.
Кој е Стефано Габана?
Стефано Габана е еден од основачите на „Долче и Габана“ и клучна фигура во обликувањето на современиот луксузен моден израз.
Роден во Милано во 1962 година, тој го започнал брендот со Доменико Долче во 1985 година. Додека Долче бил фокусиран на конструкцијата и кројот, Габана ја развил креативната и визуелната насока на брендот.
„Долче и Габана“ стана препознатлив по драматична естетика, силна женственост и инспирација од италијанската култура, особено сицилијанските мотиви, религиозната симболика и филмската естетика, што им донесе глобална препознатливост и статус на еден од највлијателните модни брендови.