Затворени гласачките места во Унгарија со историска излезност

Гласачките места на парламентарните избори во Унгарија беа затворени во 19 часот, при што е забележана рекордна излезност од 77,8%, според податоците на изборната комисија.

Според официјалните информации, до 18:30 часот гласале околу 5.856.515 граѓани, од вкупно приближно 7,5 милиони гласачи со право на глас во земјата. Дополнително, право на глас имаат и над 500.000 унгарски државјани во странство, кои можат да гласаат по пошта.

Излезноста продолжи да расте во текот на денот – до 17 часот таа изнесуваше 74,23%, што претставува апсолутен рекорд во изборната историја на земјата. Во Будимпешта излезноста беше уште повисока и достигна 77,18%.

Гласањето започна во 6 часот утрово на 10.047 избирачки места низ целата земја. Само во првиот час излезноста изнесуваше 3,46%, а до 15 часот веќе надминала 66%.

Изборната комисија соопшти дека првите прелиминарни резултати се очекуваат околу 20 часот, додека до 23 часот би можело да биде обработено 92–95% од гласовите.

На изборите, на кои се избираат 199 пратеници во унгарскиот парламент, главната трка се води меѓу владејачката партија Фидес на премиерот Виктор Орбан и опозициската проевропска партија Тиса на Петер Маѓар.

Орбан по гласањето изјави дека изборите се клучни за „безбедноста и мирот на Унгарија“, додека Маѓар повика на висока излезност и предупреди на можни изборни злоупотреби.

Гласањето во градот Мишколц накратко беше прекинато поради дојава за бомба, по што полицијата евакуираше избирачко место и потоа го продолжи процесот.

Крајните резултати од изборите треба да бидат објавени до 4 мај, додека официјалните финални податоци ќе следат по обработката на сите гласови, вклучително и поштата од дијаспората.

Изборите се сметаат за едни од најнапнатите во поновата политичка историја на Унгарија, со рекорден одзив што веќе влезе во историјата.