Ова е премногу! Бискуп го нападна Трамп по споредбата со Исус

Објавата на американскиот претседател Доналд Трамп, во која се споредува со Исус Христос, е „неприфатлива“, изјави генералниот викар на Латинскиот патријархат во Ерусалим, Вилијам Шомали за Anadolu Agency.

„Ова е премногу. Ако го сметаме Исус Христос за пример, треба да го следиме преку неговата понизност, духот на служење и саможртвата, а не преку желба за доминација, авторитет и маргинализација на другите“, изјави бискупот.

Тој додаде дека проблемот не е во тоа што Трамп се обидува да го имитира Христос, туку што се претставува како „натчовечка и голема фигура“, што, како што нагласи, е неприфатливо.

Шомали оцени дека однесувањето на Трамп за време на конфликтот со Иран ги нарушува основните христијански вредности, особено принципот „сакај го ближниот како себеси“.

Тој истакна и дека Ватикан и Католичката црква се против војната, додавајќи дека и папата и мнозинството американски бискупи не го поддржуваат конфликтот.

Во меѓувреме, Трамп вчера остро го критикуваше папа Лав XIV, нарекувајќи го „слаб“ во однос на криминалот и надворешната политика, и тврдејќи дека бил избран за да управува со односите со неговата администрација.

Американскиот претседател, исто така, на платформата Truth Social сподели фотографија генерирана со вештачка интелигенција, на која е прикажан како Исус Христос.