Skip to content
Комуникацијата на Кит улешур покажува изненадувачки сличности со човечкиот говор – вклучувајќи „абецеда“ и формирање самогласки, открива најновото научно истражување.
Овие китови, кои се одвоиле од заедничкиот предок со луѓето пред повеќе од 90 милиони години, комуницираат преку низа кратки клик-звуци, познати како „коди“. Анализите покажуваат дека тие разликуваат „самогласки“ преку должината на кликот и промените во тонот – растечки или опаѓачки.
Според студијата објавена во Proceedings of the Royal Society B, структурата на нивната комуникација има „блиски паралели со фонетиката и фонологијата на човечките јазици“, што укажува на независен еволутивен развој.
Истражувањето е дел од проектот Проект ЦЕТИ, кој ги проучува улешурите кај брегот на Доминика со цел да се разбере нивниот „јазик“.
Иако до средината на 20 век не било познато дека овие китови воопшто произведуваат звуци, денешната технологија, вклучително и вештачката интелигенција, овозможува значително подлабоко разбирање на нивната комуникација.
Основачот на проектот, Дејвид Грубер, истакна дека ова откритие покажува оти луѓето не се единствениот вид со сложен комуникациски и социјален живот. Според него, улешурите веројатно пренесуваат информации меѓу генерациите повеќе од 20 милиони години.
Истражувањето е дополнително отежнато бидејќи овие китови нуркаат и до 50 минути, додека на површината остануваат кратко време – период кога меѓусебно комуницираат.
Иако нивните звуци на прв поглед наликуваат на морзеова азбука, научниците откриле дека без паузите меѓу клик-звуците се појавуваат структури слични на човечки говор, вклучувајќи и промени во „самогласките“ за пренесување различни значења.
Лингвистот Гашпер Бегуш од Универзитет во Калифорнија, Беркли, кој го предводел истражувањето, истакна дека комуникацијата кај улешурите е посложена отколку кај други животни, како папагали и слонови.
Научниците сметаат дека овие откритија отвораат можност во иднина не само да се разбере, туку и делумно да се комуницира со овие морски животни. Целта на проектот е во наредните пет години да се дешифрираат најмалку 20 различни вокални изрази поврзани со однесувања како нуркање и спиење.