Брисел со нови мерки – Работа од дома и поевтин јавен превоз

Европска комисија подготвува пакет препораки со кои ќе ги поттикне земјите-членки да ја намалат потрошувачката на фосилни горива, во услови на нов енергетски притисок поврзан со кризата на Блискиот Исток.

Според нацрт-документ, Брисел ќе предложи мерки што треба да донесат брзо олеснување за граѓаните и компаниите – меѓу нив се охрабрување на работење од дома барем еден ден неделно каде што е можно, како и субвенции за користење јавен превоз. Целта е да се намали побарувачката за горива и да се ублажи ударот од високите цени на енергијата.

Покрај тоа, Комисијата препорачува и намалување на ДДВ за технологии што ја подобруваат енергетската ефикасност, како топлински пумпи, котли и соларни панели, со што се поттикнува побрза транзиција кон почиста енергија.

Овие предлози се надоврзуваат на мерките што беа воведени за време на енергетската криза по руската инвазија врз Украина, кога граѓаните и компаниите беа повикани да штедат енергија – вклучително и преку намалување на греењето.

Во новиот пакет се предвидуваат и т.н. „социјални лизинг“ шеми за полесен пристап до чисти технологии, како електрични автомобили, батерии и системи за греење со ниска потрошувачка.

Сепак, од Брисел нагласуваат дека станува збор за препораки, а не за обврзувачки правила. Земјите-членки ќе имаат слобода сами да одлучат кои мерки ќе ги применат, но очекувањата се дека ќе се преземат конкретни чекори ако енергетската криза дополнително се продлабочи.

Паралелно, Комисијата подготвува и законски измени со кои треба да се намалат трошоците за електрична енергија. Планот е електричната енергија да се оданочува помалку од фосилните горива, со што би се стимулирала електрификацијата на економијата.

Дополнително, се разгледуваат механизми за контрола на цените, поддршка на приходите и можност за воведување нулта даночна стапка за струјата што ја користи тешката индустрија.

Иако документот сè уште не е финализиран, пораката од Брисел е јасна – намалувањето на зависноста од фосилни горива и зголемувањето на енергетската ефикасност повторно стануваат приоритет, во време кога глобалните кризи директно се прелеваат врз европските економии и животниот стандард.