Изградбата на Коридор 8 се поместува до 2029 година, Владата уверува дека цената нема да расте

Рокот за изградба на дел од автопатските делници на Коридор 8 ќе биде продолжен до декември 2029 година, потврди министерот за транспорт Александар Николоски, кој изјави дека до пролонгирањето дошло поради, како што рече, „две изгубени години“ во претходниот период, но уверува дека нема да има дополнително зголемување на цената на проектот. 

Продолжувањето на рокот се однесува на делниците Тетово–Гостивар и Гостивар–Букојчани, кои се градат во рамки на договорот со конзорциумот „Бехтел и Енка“. Според надлежните, на терен веќе се работи со засилена динамика, а Владата тврди дека се надминуваат административните и инфраструктурните пречки што претходно го забавиле проектот. 

Николоски изјави дека изградбата на Коридор 8 останува еден од најважните инфраструктурни проекти за државата, со цел Македонија да добие модерно патно поврзување од албанската до бугарската граница. Тој посочи дека амбицијата е до 2029 година да има целосно автопатско и експресно поврзување по трасата на коридорот. 

Според податоците што ги соопштија властите, на делницата Гостивар–Букојчани моментално се работи на повеќе километри од трасата, а реализацијата достигнала околу 60 проценти, додека кај делницата Тетово–Гостивар работите се одвиваат со помал интензитет.

Коридор 8 е дел од поширок регионален и европски инфраструктурен проект што треба да ги поврзе Јадранското и Црното Море преку Албанија, Македонија и Бугарија, а во последните години често е претставуван и како стратешки безбедносен и економски коридор за регионот.