Одземен пасошот на в.д. претседателот на Основниот суд Гостивар

На в.д. претседателот на Основниот суд Гостивар, Елјеса Алији, му е одземена патната исправа и му се определени мерки на претпазливост, откако Обвинителството за гонење организиран криминал и корупција отвори истрага против него и против судски администратор поради сомнение за примање награда за противзаконито влијание.

Основниот кривичен суд во Скопје го уважил предлогот на обвинителството и на Алији му определил обврска повремено да се јавува кај службено лице, привремено одземање на постојната патна исправа, забрана за издавање нова патна или друга исправа за преминување на државната граница, забрана за преминување на границата и забрана за преземање определени работни активности поврзани со кривичното дело.

Исти мерки на претпазливост му се определени и на судскиот администратор од Основниот суд Гостивар, кој е второосомничен во предметот. Од Кривичниот суд појасниле дека не може да се определи построга мерка од бараната, бидејќи обвинителството не побарало притвор, туку мерки на претпазливост.

Според обвинителството, двајцата осомничени во периодот од јануари 2023 година до 2025 година, користејќи ја службената положба и реално или претпоставено влијание како претседател на суд и судски администратор, барале и примиле парична награда од 8.000 евра. Второосомничениот, според наводите во истрагата, примил и дополнителни 800 евра.

Предметот се однесува на граѓански спор во кој, според обвинителството, осомничените му ветиле помош на лице што било странка во постапка. На почетокот на 2023 година, за надомест од 5.000 евра, тие требало да интервенираат кај судија во Основниот суд Гостивар за да се донесе решение за повторување на постапка во која претходно била донесена одбивателна пресуда.

Откако тоа не успеало, според обвинителството, биле побарани уште 3.000 евра за интервенција кај судии во втор степен, со цел да се укине решението со кое не било дозволено повторување на постапката. Дополнителните 800 евра, според истите наводи, биле дадени на второосомничениот за постапување поврзано со писмен документ доставен од извршител.

Истрагата е отворена за кривично дело „примање награда за противзаконито влијание“. Во оваа фаза станува збор за основано сомнение и за истражна постапка, а не за обвинение или судска пресуда.

Името на Елјеса Алији и претходно беше поврзувано со постапки и наоди за работењето на Основниот суд Гостивар. Во јавноста претходно беа објавени информации дека против него имало постапка во Судскиот совет, откако биле утврдени пропусти во постапување со предмети од периодот кога бил судија за извршување санкции.

Во 2025 година, Државниот завод за ревизија утврди сериозни слабости во работењето на Основниот суд Гостивар, меѓу кои и проблеми со евиденцијата на одземени пари, скапоцености и други предмети што влегувале во судот. Судскиот совет тогаш најави дека ќе ги разгледа наодите од ревизорскиот извештај.