Skip to content
Дисциплинската комисија на Фудбалската федерација на Македонија изрече серија парични казни за клубови и поединци поради пиротехника, навредливи пораки, националистичко скандирање, слаба организација и нарушување на редот на натпреварите од Првата и Втората македонска фудбалска лига. Највисока санкција доби ГФК Тиквеш 1930, кој ќе треба да плати вкупно 10.000 евра.
ФФМ истовремено поведе дисциплинска постапка против ФК Вардар поради, како што е наведено, недолично, потценувачко, дискриминирачко и деградирачко прославување од страна на фудбалерите по освојувањето на шампионската титула. Постапката се однесува на прославата што предизвика реакции во јавноста, откако на социјалните мрежи беа објавени снимки со навредлива содржина.
Покрај отворената постапка, Вардар е казнет и со вкупно 3.500 евра за употреба на пиротехника. Клубот ќе треба да плати 1.000 евра за пиротехнички средства на натпреварот против Пелистер во 26. коло и дополнителни 2.500 евра за ист прекршок на натпреварот против Силекс во 31. коло.
Шкендија е санкционирана со 5.000 евра поради навредливо скандирање кон ФФМ и скандирање со националистичка содржина на натпреварот против Струга Трим Лум. Казни добија и двајца членови на тетовскиот клуб: фудбалерот Имран Фетаи е казнет со 500 евра поради кршење врата по натпреварот против Силекс, а тренерот Јетон Беќири со 500 евра поради вербален напад врз припадници на МВР.
Највисоката вкупна казна е за Тиквеш. Клубот од Кавадарци е санкциониран со 5.000 евра поради истакнување банер со навредлива содржина кон ФФМ на натпреварот против Аресими, а со уште 5.000 евра поради користење пиротехника и топовски удари, како и поради попречување на камерман при директен телевизиски пренос.
Казна од 5.000 евра доби и Брегалница 2008 поради слаба организација, присуство на неслужбени лица и недозволен број редари на натпреварот против Шкендија Арачиново. Шкендија Арачиново е казнета со 1.000 евра за употреба на пиротехника и влегување на претседателот на клубот на теренот. Помали казни добија и Осогово, Детонит Плачковица и Каменица Саса за пиротехника и фрлање предмети на теренот.
Одлуките на ФФМ доаѓаат во период кога домашниот фудбал повторно е под притисок од навивачки инциденти, политизирани пораки и слабости во организацијата на натпреварите. Серијата казни покажува дека федерацијата се обидува да испрати дисциплинска порака, но и дека проблемот не е изолиран на еден клуб или еден натпревар, туку се повторува на различни терени и во различни форми.
