Филипче: Власта се задолжува, граѓаните ќе ја плаќаат сметката

Власта се задолжува со темпо што, според претседателот на СДСМ, Венко Филипче, ја турка државата во економски ризик, откако тој на денешната прес-конференција обвини дека за две години Владата на Христијан Мицкоски создала нов долг од 2,5 милијарди евра, товар што ќе го враќаат идните генерации.

Филипче оцени дека Владата на ВМРО-ДПМНЕ е целосно фокусирана на нови задолжувања, додека економската состојба во земјата, според него, постојано се влошува. Тој посочи дека јавниот долг е зголемен и дека државата бара нови извори на финансирање наместо да создава економски раст.

Во однос на последното задолжување од 260 милиони евра, Филипче повтори дека пратеничката група на СДСМ нема да учествува во собраниската расправа. Според него, фактот што Владата побарала 300 милиони евра, а добила 260 милиони, покажува дека кредитниот рејтинг на државата слабее во очите на банките.

Филипче предупреди дека Македонија постепено влегува во група земји со ризичен кредитен рејтинг. Тој оцени дека ова е сериозен сигнал за недоверба кон економските политики на Владата и кон начинот на кој се управува со јавните финансии.

Критикувајќи ја економската состојба, Филипче рече дека со Мицкоски на власт нема ниту еден добар економски сегмент. Според него, индустријата, како столб на економијата, губи работни места, бројот на вработени е намален за 2,8 проценти, а странските инвестиции се намалени за 60 проценти.

Тој оцени дека ваквите бројки се резултат на влошена економска состојба, слаба инвестициска клима и недоверба во Владата.