Skip to content
Израелската армија зазеде стратешки важна планина во јужен Либан, каде што се наоѓа замокот Бофорт од времето на крстоносците, што претставува најдлабок напредок на либанска територија за повеќе од четвртина век, соопшти израелската војска.
Заземањето на замокот Бофорт во близина на градот Набатија следеше по неколкудневни жестоки борби и воздушни напади врз околните села, каде што израелските сили се судрија со членови на Хезболах на тешко пристапен планински терен.
Ова е значајна територијална добивка за Израел во најновата војна меѓу Израел и Хезболах, која започна на почетокот на март. Израел и Либан формално се во војна од основањето на израелската држава во 1948 година.
Портпаролот на израелската армија за арапското говорно подрачје, Авичај Адрае, објави на социјалната мрежа X фотографија од израелски војници пред замокот, додека министерот за одбрана Израел Кац изјави дека израелското знаме е кренато на тврдината. Израелските сили веќе еднаш го окупираа замокот во 1982 година и го држеа под контрола сè до повлекувањето од Либан во 2000 година.
Израелската армија објави дека пред неколку дена започнала операција во областа Бофорт Риџ и долината Сулуки, јужно од замокот, со цел уништување на инфраструктурата на Хезболах и отстранување, како што се наведува, „директни закани за израелските цивили“. Во соопштението се додава дека армијата е подготвена да „ја прошири операцијата доколку е потребно“.
Во последните денови, Израел дополнително го прошири опсегот на своите операции во Либан. Израелските сили ја преминаа реката Литани, која досега служеше како неофицијална граница на операциите, и наредија евакуација на жителите на голем дел од јужен Либан.
Израел ја прогласи областа помеѓу реките Литани и Захрани за борбена зона. Дел од населението веќе ја напушти областа поради интензивните напади во последните денови, но цивилите сè уште живеат во многу градови.
Израелските трупи во последните денови напредуваат низ селата во близина на замокот Бофорт откако ја преминаа реката Литани. Тие моментално се наоѓаат на околу пет километри од Набатија, еден од најважните градови во јужен Либан. Армијата повика на евакуација на сите жители на тој град, како и на жителите на крајбрежниот град Тир, четвртиот по големина град во Либан, и околните области.
