Добра вест за туристите: Грција ќе отвора дополнителни пунктови на границите

Грција најави воведување модуларни контролни пунктови на копнените гранични премини, со цел да се намалат метежот и долгото чекање во периоди на зголемен туристички сообраќај.

Најавата е особено важна за македонските граѓани кои во летниот период најчесто патуваат кон Грција преку граничниот премин Евзони, каде што секоја сезона се создаваат долги колони, особено за време на викендите, празниците и утринските часови.

Заменик-министерот за внатрешни работи на Грција, надлежен за областите Македонија и Тракија, Константинос Гиулекас, соопшти дека во соработка со Министерството за заштита на граѓаните се поставуваат модуларни контролни пунктови, со кои една сообраќајна лента ќе може да се прошири во две.

Целта е граничните проверки да се одвиваат побрзо, без да се чека целосната модернизација на инфраструктурата на премините.

Гиулекас го спомена граничниот премин „Кипи“ кон Турција, каде што надградбата веќе е во тек, но и планот за модернизација на „Евзони“ кон Македонија. Според него, токму по модернизацијата на овој премин ќе се создадат услови за поголема флексибилност и користење дополнителни капацитети.

Дополнителен проблем за летниот сообраќај е новиот европски систем за биометриска регистрација на државјани од трети земји. Тој предвидува подетални проверки при влез во земјите од Европската Унија, што може да го зголеми времето на чекање на границите.

Сепак, грчкиот заменик-министер посочи дека европската регулатива дозволува делумно суспендирање на имплементацијата на системот во периоди кога има зголемен сообраќај. Тоа значи дека во најкритичните денови може да се применуваат пофлексибилни решенија за да се избегнат големи застои.

За македонските патници оваа најава доаѓа во важен момент, бидејќи летната сезона веќе почнува, а граничниот премин Богородица–Евзони традиционално е најоптоварената рута кон грчките летувалишта.

Доколку новите пунктови профункционираат навреме, тие би можеле да го скратат времето на чекање, но нема целосно да го отстранат ризикот од гужви во ударните термини. Затоа, патниците и натаму ќе треба да ги планираат тргнувањата внимателно, особено во петок попладне, сабота наутро и за време на празнични викенди.