Skip to content
Северна Кореја утринава истрела балистичка ракета кон морето источно од Корејскиот Полуостров, само неколку дена пред почетокот на големите заеднички воени вежби на Јужна Кореја и САД. Ракетата прелетала околу 700 километри, а нејзиниот точен тип сè уште се утврдува.
Лансирањето било регистрирано околу 6 часот наутро од реонот на Вонсан, на источниот брег на Северна Кореја. Според јужнокорејскиот Здружен генералштаб, проектилот паднал во морето, а воените власти на Јужна Кореја и Јапонија ги анализираат неговите карактеристики.
Јапонските власти соопштија дека ракетата достигнала височина од околу 90 километри и паднала надвор од јапонската ексклузивна економска зона. Токио испратил протест до Пјонгјанг, додека во Сеул бил свикан итен состанок на Советот за национална безбедност.
Ова е второ севернокорејско ракетно лансирање за помалку од една недела. Претходниот проектил исто така бил истрелан од областа Вонсан на 6 август, а според јужнокорејските проценки денешниот тест е единаесеттиот сомнителен тест на балистичка ракета од почетокот на годинава.
Новото лансирање доаѓа непосредно пред почетокот на заедничката воена вежба „Ulchi Freedom Shield“, која Јужна Кореја и САД треба да ја одржат од 17 до 27 август. Пјонгјанг со години ги осудува овие вежби и ги претставува како подготовки за напад врз Северна Кореја.
Од Пјонгјанг засега нема официјално соопштение за денешното лансирање.
