Skip to content
УНИЦЕФ во истражувањето „Повеќе од средба“, објавено во октомври, укажува дека недостигот од време и работната оптовареност го отежнуваат професионалниот развој на наставниците во Македонија. Организацијата препорачува подостапна поддршка и пофлексибилни можности за соработка.
Меѓу испитаниците што се соочуваат со пречки за учество во професионалните заедници за учење, 59 проценти ги посочуваат времето и обемот на работа. Само седум проценти сметаат дека учеството не е корисно.
Проблем е и информираноста: 42 проценти од наставниците со минимално или никакво учество не знаат како или каде да се приклучат. Овие заедници овозможуваат размена на наставни материјали, искуства и идеи за работата со учениците.
Анкетата опфатила 4.075 испитаници од декември 2024 до април 2025 година. Примерокот е нерепрезентативен, па процентите не може автоматски да се пресликаат врз сите наставници во земјата.
УНИЦЕФ препорачува јасни информации за приклучување и формално признавање на учеството во професионалниот развој. За наставниците на почетокот на кариерата предлага практични насоки, а за поискусните можности за менторство и професионална соработка.
Наставниците ја бараат соработката за конкретните потреби во училницата. Од анкетираните, 60 проценти го наведуваат подобрувањето на наставните вештини како причина за вклучување, а 52 проценти сакаат пристап до планови за часови или нови материјали. Интересот е насочен кон практична поддршка што можат да ја применат во секојдневната работа со учениците.
Истражувањето покажува и разлика меѓу желбата за соработка и реалното учество. Во регионални работилници учествуваат 10 проценти од испитаниците, додека 42 проценти изразиле желба да се вклучат. УНИЦЕФ предлага развивање пофлексибилни формати, со комбинирање средби во живо и онлајн активности, за соработката да стане подостапна.
