Skip to content
Илјадници ученици, студенти и наставници во Грција на 21 октомври излегоа на улиците барајќи повеќе пари за образованието, безбедни училишта и достапно домување. Само во Атина, според полициската процена, протестирале околу 10.000 луѓе. На младите им се придружија родители, синдикати и вработени во јавните служби, поврзувајќи ги проблемите во образованието со растечките трошоци за живот.
Протести се одржаа и во Солун, Патра, Лариса, Волос, Јанина и на Крит. Во грчката престолнина, поворката тргна од Пропилеите кон плоштадот Синтагма и Парламентот, со транспаренти на грчки, англиски и француски јазик.
„Од Грција до Франција сакаме јавно и бесплатно образование“, беше една од пораките што ја забележаа грчките медиуми. Весникот „Авги“ извести дека демонстрантите барале обновување на училишните згради и студентските домови, како и заштита од високите кирии и поскапувањата што ги оптоваруваат семејствата.
За студентите, домувањето е меѓу најитните прашања. Според јавниот сервис ЕРТ, тие бараат пониски кирии, повисок станбен додаток со поширок опфат на корисници и повеќе места во студентските домови. Нивната порака е дека трошоците за живеење стануваат пречка за завршување на студиите.
„Нашите родители не можат да врзат крај со крај за да ни ги платат киријата, струјата и животот тука“, изјави за Ројтерс 21-годишната студентка Георгија Фукиду, која учествуваше на протестот во Атина. Таа ги опиша кириите како превисоки, а достапните станови како премали.
Дваесетгодишниот студент по инженерство Панајотис Мосхонас, пак, за Асошиејтед прес оцени дека државната поддршка за кирија е недоволна и дека не им помага на студентите навреме да се справат со секојдневните трошоци. На дел од транспарентите стоеше прашањето дали младите треба да студираат или да преживуваат.
Наставничките барања ги опфатија недостигот од кадар, платите и условите за работа. Федерацијата на наставниците во основното образование организираше 24-часовен штрајк, додека други образовни и синдикални организации се придружија со прекини на работата. Во мобилизациите учествуваа и болнички лекари, барајќи вработувања и поголемо финансирање на јавните услуги.
Главната поворка во Атина заврши мирно, но потоа во областа Омонија имаше ограничени инциденти со фрлање предмети кон полицијата, која употребила шок-бомби. ЕРТ објави за вкупно 25 приведувања во рамките на превентивните проверки и по инцидентите.
Министерката за образование Софија Захараки пред протестите изјави дека ги слуша студентските барања и го призна притисокот што трошоците за домување го создаваат врз домаќинствата. Таа посочи дека се реализираат проекти вредни повеќе од 733 милиони евра за нови студентски домови и подобрување на објектите.
Во Солун, по маршот, претставници на ученичките и студентските здруженија се собраа во Работничкиот центар за координирање на следните активности, објави „Авги“. Меѓу барањата што ги изнесоа студентските претставници се ограничување на кириите и зголемена финансиска поддршка за домување.
