Skip to content
Израелската армија принуди околу 1.200 Палестинци да ги напуштат своите домови во Хеброн на окупираниот Западен Брег, изјави денес палестински функционер, еден ден откако во палестински напад беа убиени двајца израелски војници. Израелскиот премиер Бенјамин Нетанјаху вчера изјави дека армијата ќе започне голема операција откако војници беа убиени кога двајца палестински вооружени лица отворија оган врз контролен пункт на армијата во близина на градот.
Израелската војска објави дека напаѓачите се убиени. Исто така, се наведува дека целта на операцијата во населбите Ал-Џалада и Еин Деир Баха, во близина на воениот контролен пункт на влезот во Хеброн, била да се бараат членови на вооружени групи и оружје. Во соопштението се вели и дека војската ќе изврши уривање на згради.
„Колективна казна“
Палестинската самоуправа ја критикуваше операцијата како „колективна казна“. Јусеф Зухаир Ал-Џабари, градоначалникот на општина Хеброн, рече дека околу 1.300 луѓе се изложени на ризик да останат бездомници, покрај 1.200 веќе раселени.
Тој, исто така, истакна дека израелските операции биле мотивирани од парламентарните избори во вторник, на кои десничарската коалиција на Нетанјаху би можела да го изгуби мнозинството, според анкетите на јавното мислење. „Нетанјаху и радикалните министри во неговата влада се обидуваат да освојат што е можно повеќе гласови на имигрантите“, рече Ал-Џабари.
Клубот на палестински затвореници, невладина организација, соопшти дека израелските сили вчера и денес уапсиле околу 70 Палестинци. Израелските власти не дадоа коментари за апсењата. Ал-Џабари рече дека армијата срушила продавници, фабрики, куќи и патишта во Хеброн и дека одговорот бил непропорционален и неоправдан.
Жителите на Хеброн изјавија за Ројтерс дека војската принудила многу луѓе кои немале никаква врска со палестинските напаѓачи да ги напуштат своите домови. „Ги повикуваме службените лица да застанат со нас бидејќи не сме вклучени во ништо од ова. Има деца тука. Изолирани сме, не правиме ништо. Сето ова е произволно“, рече Маџди Насер, еден од оние кои морале да ги напуштат своите домови.
Знаци на празни куќи
Жителите за Ројтерс изјавија дека виделе израелски војници како ги обележуваат куќите со црн X откако нивните палестински жители биле принудени да ги напуштат. Не е веднаш јасно што значи знакот, објави Ројтерс.
Владата на Нетанјаху претседава со брзото ширење на доселеничките населби, кои телата на ОН и повеќето земји ги сметаат за нелегални, иако Израел го оспорува ова. Низ целиот Западен Брег, Израел ги блокираше влезовите во повеќето палестински градови и места, сериозно ограничувајќи ја слободата на движење на Палестинците.
Јусеф Мур, жител на палестинскиот град Јат, рече дека не можел да патува до Ерусалим со својата ќерка, која се лекува од рак, поради затворањето. „Ситуацијата е лоша и ние страдаме. Кога се обидовме да преминеме, тие испукаа шок-бомби кон нас и мојата ќерка се исплаши по патот. Тие испукаа шок-бомби кон луѓето. Ситуацијата е многу тешка“, рече Мур.
