Skip to content
Турција и Катар потпишаа историски договор за меѓусебна одбрана, зајакнувајќи го своето стратешко и безбедносно партнерство за одвраќање среде брзо менувачкиот безбедносен пејзаж на Заливот и Блискиот Исток.
Турскиот претседател Реџеп Таип Ердоган и катарскиот емир шеикот Тамим бин Хамад Ал Тани се сретнаа во петокок во Истанбул за да копретседаваат со Врховниот стратешки комитет меѓу Катар и Турција, склучувајќи широк спектар билатерални договори.
Двајцата лидери го усвоија договорот за меѓусебна одбрана „насочен кон зајакнување на колективната одбрана и постигнување регионална безбедност и стабилност, како и усвојување единствен став во случај на каков било надворешен вооружен напад насочен против едната или двете страни“, се наведува во заедничкото соопштение објавено од двете земји.
„Двете страни се согласија да одржуваат консултации за заканите по нивната безбедност… и да ја зајакнат соработката преку заеднички воени вежби, соработка во областа на одбранбените индустрии и размена на обука на персонал“, се вели во соопштението.
Двете земји истакнаа дека нивниот договор ја нагласува нивната заедничка визија за побезбеден и постабилен регионален поредок, при што кабинетот на Ердоган соопшти дека тој ќе „додаде нова димензија на братските врски меѓу двете земји“.
„Претседателот Ердоган изјави дека ќе продолжиме да работиме заедно за да спречиме повторно избувнување војна во регионот на Заливот и да воспоставиме основа за дијалог и постигнување мир“, се наведува во соопштението на турското претседателство на социјалната мрежа Икс (X), и се додава дека договорот ќе ја прошири соработката во одбранбената индустрија меѓу двете земји.
Турција и Катар ќе продолжат да работат заедно „за да спречат обновено избувнување војна во регионот на Заливот и да промовираат дијалог и мир“, рече Ердоган.
Лидерите разговараа за нападите на Израел врз Газа и хуманитарната ситуација на палестинската територија, напорите за нормализација во Сирија и најновите случувања во Либија, се додава во соопштението.
Катар и Турција потпишаа и повеќе договори за трговска и енергетска соработка, како и за дипломатија, образование и култура.
Новото партнерство доаѓа во време на брзи регионални одбранбени прегрупирања поттикнати од војната со Иран, при што Турција, Катар, Саудиска Арабија, Пакистан и Индонезија за само неколку месеци обликуваат нова мапа на одбранбени сојузи во регионот.
Земјите од Заливот јасно ставија до знаење дека регионалниот безбедносен чадор на САД продолжува да биде централен за нивната безбедносна архитектура, но со оглед на тоа што Вашингтон сигнализира сопствено глобално прегрупирање, земјите од Заливот сега ги прошируваат своите одбранбени стратегии, во контекст на тековната реалност на „ниту војна, ниту мир“.
Во август, Турција, Пакистан и Саудиска Арабија го потпишаа „Заедничкиот одбранбен договор од Мека“, регионален одбранбен пакт според кој трите земји би си притекнале на помош една на друга доколку една од нив биде нападната.
Ратификуван од турскиот парламент минатата недела, пактот ја поврзува членката на НАТО, Турција, која ја има втората по големина војска во алијансата, со Пакистан, единствената држава со нуклеарно оружје во муслиманскиот свет, и Саудиска Арабија, водечката сила во Заливот.
Турција соопшти дека договорот не е насочен против ниту една друга земја и останува отворен за други држави, вклучувајќи го и Египет.
Исто така во август, Пакистан и Кувајт потпишаа договор за заедничка одбрана и воена соработка.
Во октомври, Катар, Турција, Пакистан и Индонезија го потпишаа мултилатералниот меморандум за разбирање „Бадр“ за соработка во одбранбената индустрија.
