Skip to content
Ниту еден човек досега не стапнал на врвот на Гангкар Пунсум, висок околу 7.570 метри на границата меѓу Бутан и Кина. Планината е највисоката неосвоена на светот, а Бутан ја забранува секоја алпинистичка експедиција во регионот, така што нејзиниот врв можеби и никогаш нема да биде освоен.
Најголем дел од планината, вклучително и самиот врв, лежи на страната на Бутан. Обидите за искачување се случиле меѓу 1983 и 1994 година, кога експедиции од Јапонија, Австралија и Велика Британија ги пробале патиштата кон врвот. Ниту една не стигнала до 7.000 метри. Британскиот тим бил евакуиран со хеликоптер откако силни ветрови го блокирале искачувањето.
Во 1994 година Бутан го забрани искачувањето на сите планини во регионот повисоки од 6.000 метри. Во 2003 година забраната беше проширена на сите алпинистички искачувања во државата. Првата причина е безбедноста, бидејќи во тој дел нема спасувачки служби кои би помогнале на алпинистите во опасност.
Втората причина е духовна. Името на планината најчесто се преведува како „Бел врв на тројцата духовни браќа“. Локалното население што го практикува тибетскиот будизам верува дека врвовите се дом на божествата заштитници Јул Лха, чие вознемирување би донело несреќа на целиот крај. Планината се поврзува и со легендите за Мигои, попознат како Јети, и за громогласните змејови Друк, кои се наоѓаат на државното знаме на Бутан.
Кина тврди дека врвот се наоѓа на нејзина територија, а тоа еднаш довело до дипломатски проблем. Во 1998 година јапонски тим се обидел да му пријде од тибетската страна, но експедицијата била прекината по протестите на Бутан, а деталите за настанот и денес не се сосема јасни. Алпинистот Тамоцу Накамура изјавил дека дозволата била повлечена поради политичко прашање со бутанската влада. Наместо тоа, Јапонците се искачиле на соседниот врв Лиангканг Кангри, од каде што го виделе стрмоглавиот пат што води кон главниот врв и го оцениле како исклучително опасен.
Се смета дека дури Бутан и да ја укине забраната и ако се воспостави спасувачка инфраструктура, Гангкар Пунсум ќе остане недофатлив. Дотогаш, погледот од соседниот врв е најблиското што човекот го видел од највисоката неосвоена планина на светот
