Европско-јапонската мисија „БепиКоломбо“ пристигна кај Меркур по повеќе од осум години патување. Двете сонди треба да ја истражат површината, внатрешноста и магнетното поле на најмалата планета во Сончевиот Систем, а влегувањето во орбита е предвидено за 21 ноември.
Мисијата е заеднички проект на Европската вселенска агенција и Јапонската агенција за вселенски истражувања. Лансирана е на 20 октомври 2018 година, а патувањето вклучуваше девет прелетувања покрај планети: едно покрај Земјата, две покрај Венера и шест покрај Меркур.
Долгата траекторија била неопходна за леталото постепено да ја приспособи брзината и да стигне до орбитата на Меркур, совладувајќи го силното гравитациско влијание на Сонцето.
Двете сонди имаат различни задачи. Европската MPO ќе ја мапира површината и ќе го истражува составот на планетата, додека јапонската „Мио“ ќе ги проучува магнетното поле и неговото заемно дејство со сончевиот ветер.
Меѓу главните прашања се зошто Меркур има толку големо железно јадро во однос на својата големина и како се создава неговото магнетно поле. Податоците треба да помогнат и во разбирањето на настанувањето и развојот на планетите што орбитираат блиску до своите ѕвезди.
Пристигнувањето ќе се одвива во неколку етапи. Раздвојувањето на сондите е планирано за 9 и 10 декември, по што ќе следуваат дополнителни маневри и проверки на инструментите. Почетокот на главните научни набљудувања е предвиден за април 2027 година.

