Skip to content
Јавниот долг до крајот на годината ќе надмине 11 милијарди евра поради нови задолжувања од 480 милиони евра, изјави пратеникот од опозициската СДСМ, Фатмир Битиќи, во гостување на ТВ 24. Според него, за две и пол години јавниот долг е зголемен за вкупно 2,5 милијарди евра.
Битиќи побара институционално објаснување за начинот на кој се евидентира задолжувањето од 330 милиони евра на Јавното претпријатие за државни патишта (ЈПДП), заедно со дополнителните 150 милиони евра што ги најави министерката за финансии Гордана Димириеска-Кочоска. Тој посочи дека овие 480 милиони евра, додадени на постојните 10,7 милијарди евра долг, ја надминуваат границата од 11 милијарди евра.
Пратеникот го оцени вториот ребаланс на државниот буџет како резултат на лошо планирање и несоодветно управување со јавните финансии. Според изнесените податоци на Битиќи, реализацијата на буџетските приходи изнесува 73,4 отсто, на расходите 76,6 отсто, додека кај капиталните инвестиции има намалување од 5,8 милијарди денари.
Битиќи најави дека опозицијата ќе бара одговори на собраниската комисиска расправа за тоа како заклучно со 19 октомври е остварена реализација на капиталните расходи од 55,4 отсто во однос на важечкиот буџет. Тој критикуваше дека намалувањето на планираните средства во буџетот се користи за вештачко прикажување на повисок процент на реализација.
Во однос на поддршката на домашното стопанство, пратеникот изнесе тврдење дека 210 компании биле одбиени при аплицирањето за договори според Законот за финансиска поддршка на инвестициите поради негативно мислење од Министерството за финансии за недостаток на средства. Тој додаде дека кон 170 компании се останати неподмирени обврски во износ од 750 милиони денари од 2024 година.
