Во Гана сакаат да го заштитат какаото, но земјоделците стравуваат од новите правила

Нова законска мерка во Гана предвидува плантажите со какао да добијат статус на заштитено земјоделско земјиште, со што нивната пренамена за други култури или активности би била можна само со одобрение. Земјоделците ја поддржуваат заштитата на производството, но предупредуваат дека правилата може да создадат проблеми за оние чии стари или заболени насади повеќе не се продуктивни. 

Предлогот е дел од пошироките напори на Гана да го запре намалувањето на површините под какао. Дел од земјоделското земјиште во земјата се пренаменува за други култури, но и за рударски активности, што дополнително го намалува просторот за производство на една од најзначајните земјоделски суровини во земјата. 

Според новите правила, сопствениците на плантажи не би можеле самостојно да ги пренаменат површините со какао без одобрение од Ганскиот одбор за какао, познат како КОКОБОД. За прекршителите се предвидуваат високи парични казни, а во одредени случаи и затворска казна до 20 години. 

Токму висината на предвидените казни предизвика дополнително внимание, но земјоделците имаат и поконкретна забелешка. Тие прашуваат што ќе се случи со насадите кои се заболени, стари или веќе не носат доволно принос за да бидат економски исплатливи.

Земјоделските организации ја поддржуваат идејата да се спречи уништувањето на плантажите, но бараат одредбите да бидат дополнително разгледани и подобро објаснети пред да стапат во сила. Особено загрижени се за можноста земјоделец да биде казнет ако мора да отстрани неисплатлив или заболениот насад и на неговото место да засади друга култура. 

Од КОКОБОД ги отфрлаат критиките и велат дека целта на мерката е токму заштита на земјоделците и долгорочно зачувување на производството на какао. Одборот смета дека дел од критиките имаат политичка заднина. 

Законската мерка сè уште не е целосно стапена во сила. Парламентот ја одобрил во јули, но претседателот Џон Драмани Махама сè уште не ја потпишал и нема објавено кога ќе го направи тоа. 

Гана и Брегот на Слоновата Коска заедно произведуваат околу половина од светското какао, па промените во земјоделската политика на овие две земји имаат значење и за глобалниот пазар. 

Во основата на спорот е едно практично прашање: како да се заштити производството на какао без земјоделците да бидат принудени да продолжат да обработуваат земјиште на кое веќе не може успешно да се произведува какао.