Skip to content
СДСМ го обвини премиерот Христијан Мицкоски дека во политичката комуникација користи поделби на „патриоти“ и „предавници“ и дека со таквата реторика го следи моделот што, според партијата, го применувал Ванчо Михајлов кон своите политички противници.
Во соопштение од партискиот Центар за комуникации, СДСМ тврди дека означувањето на политичките неистомисленици како предавници и одроденици било дел од пропагандата на Михајлов, а дека слична поделба денес препознава и во настапите на Мицкоски.
Како пример, опозициската партија го посочува говорот на премиерот на Илинден, во кој тој зборуваше за борба против „омразата, цинизмот и талогот што ја трујат Македонија“. Формулацијата е дел и од официјално објавениот говор на Мицкоски на владината интернет-страница.
СДСМ оценува дека ваквата реторика дополнително ги продлабочува политичките поделби и го обвинува Мицкоски дека гради политичка кампања врз создавање спротивставени групи во општеството. Во соопштението партијата упатува и низа остри квалификации кон ВМРО-ДПМНЕ и премиерот, поврзувајќи ги со, како што наведува, „политика на омраза, поделби, изолација и контрола“.
Од СДСМ тврдат и дека во настапот на Мицкоски за Илинден се прави обид да се поврзат различни периоди од македонската историја, вклучително и историското ВМРО и АСНОМ, што партијата го оспорува.
„Македонскиот народ отсекогаш бил слободарски и антифашистички настроен“, наведуваат од СДСМ, од каде порачуваат дека ќе продолжат да се спротивставуваат на политиката која, според нив, создава поделби меѓу граѓаните.
