Skip to content
Бугарските медиуми го пренесуваат најновиот извештај на Европската комисија за Македонија со нагласен фокус на неисполнетите уставни измени и внесувањето на Бугарите во Уставот. Но, во известувањата на дел од медиумите се издвојуваат и сериозните забелешки на Брисел за борбата против корупцијата, политичките влијанија врз судството и бавното спроведување на реформите.
Бугарското национално радио (БНР) објавува текст со наслов „ЕК: Северна Македонија нема напредок во преговорите за членство во ЕУ“, во кој се нагласува дека земјата не ја исполнила обврската за уставни измени преземена во рамките на договорената преговарачка рамка од 2022 година.
Покрај уставното прашање, БНР ги пренесува и забелешките за недоволниот напредок во правосудството и борбата против корупцијата, кои остануваат меѓу најсериозните предизвици за европската интеграција.
Бугарската телевизија bTV известува под наслов „Без Бугари во Уставот нема пристапување во Европската Унија“, но истовремено посветува внимание и на оценките за владеењето на правото, корупцијата и политичката поларизација во Македонија.
Порталот Dnes.bg, пак, објавува текст со наслов „Брисел ја искара Северна Македонија: Нема напредок, Бугарите мора да бидат во Уставот“, ставајќи го во преден план политичкиот застој околу уставните измени.
Факти.бг прави преглед на реакциите на македонските медиуми на извештајот, меѓу кои и анализата на Рацин.мк. Во известувањето се опфатени уставните измени, отсуството на резултати од Заедничката историска комисија, како и критиките за политичките влијанија врз правосудството.
Брисел предупредува и на сериозни слабости во реформите
Иако уставните измени остануваат непосреден услов за продолжување на пристапниот процес, извештајот на Европската комисија од 4 ноември содржи и критички оценки за реформите што се во надлежност на македонските институции.
Во борбата против корупцијата не е забележан напредок. Корупцијата и натаму е распространета, а одолговлекувањето на постапките за висока корупција и застарувањето на одредени предмети дополнително ја поткопуваат довербата во институциите.
Судството продолжува да се соочува со политички влијанија, недостиг од финансиски средства и човечки ресурси, што негативно се одразува врз неговата независност и ефикасност.
Европската комисија укажува и на потребата од поефикасно функционирање на демократските институции, спроведување на реформите во јавната администрација и зајакнување на заштитата на основните права.
Истовремено, извештајот препознава напредок во одредени области, меѓу кои дигитализацијата на јавните услуги и усогласеноста со заедничката надворешна и безбедносна политика на Европската Унија.
Европскиот пат не зависи само од уставните измени
Известувањето на бугарските медиуми покажува дека прашањето за внесување на Бугарите во Уставот останува централна тема во Софија кога станува збор за европската интеграција на Македонија.
Сепак, целосната оценка на Европската комисија покажува дека земјата се соочува со два паралелни предизвика: политичкиот застој околу уставните измени и недоволните резултати во спроведувањето на домашните реформи.
Уставните измени се услов за следната фаза од пристапниот процес, но нивното евентуално усвојување само по себе нема да ги реши проблемите со корупцијата, независноста на судството и функционирањето на институциите.
Пораката од Брисел е дека европската интеграција не завршува со исполнување на политичките услови, туку бара и конкретни, мерливи резултати од реформите што треба да ги спроведе самата држава.
