Не ги задржаа бронзите: Потегот на Бошковиќ и Терзиќ ја трогна Србија

Бошковиќ и Терзиќ не ги задржаа своите бронзени медали по победата на Србија над Полска на Европското првенство во Истанбул. Тијана Бошковиќ и селекторот Зоран Терзиќ им ги подарија одличјата на две одбојкарки кои беа дел од тимот, но останаа без медали на церемонијата.

Србија ја совлада Полска со 3:1, по сетови 25:21, 25:19, 15:25 и 25:18, со што го освои третото место на европскиот шампионат.

Додека 14 одбојкарки и селекторот ги примаа медалите, повредената Миња Осмајиќ и младата Наѓа Антоновиќ стоеја настрана. Антоновиќ патувала со репрезентацијата, но не била регистрирана за ниту еден натпревар.

Бошковиќ го извади својот медал и ѝ го подари на Осмајиќ, додека Терзиќ своето одличје ѝ го предаде на Антоновиќ. Со овој потег тие покажаа дека придонесот кон екипата не се мери само со минутите поминати на теренот.

Гестот брзо се прошири на социјалните мрежи и предизвика бројни реакции во Србија. По натпреварот, Бошковиќ рече дека медалот има особена тежина и дека е горда на помладите соиграчки и на начинот на кој екипата реагирала по поразот во полуфиналето.

Осмајиќ поради повреда не можеше да ѝ помогне на Србија во завршницата на првенството, додека Антоновиќ беше со репрезентацијата во Брно и Истанбул, но не доби право на настап. Токму затоа предавањето на медалите стана еден од највпечатливите моменти на церемонијата.