Авиокомпаниите воведуваат нови такси и кратат летови – патниците ќе плаќаат повеќе

Наглиот скок на цените на авионското гориво, поттикнат од конфликтот меѓу САД и Израел со Иран, сериозно ја погоди глобалната авиоиндустрија. Компаниите се принудени да ги зголемуваат цените, да воведуваат нови такси и да кратат летови.

Според извештаите на Reuters, цената на млазното гориво во последните недели скокнала од околу 85–90 долари за барел на дури 150 до 200 долари – сериозен удар за сектор во кој горивото учествува со околу една четвртина од вкупните оперативни трошоци.

Грчката авиокомпанија Aegean Airlines најави можна суспензија на летовите кон Блискиот Исток и предупреди на „значително влијание“ врз финансиските резултати.

Air France планира да ги зголеми цените на билетите за долги релации, со дополнителни околу 50 евра по повратен лет, додека KLM ќе откаже околу 160 европски летови следниот месец.

Од Индија, Air India предупреди дека постојните доплати не го покриваат растот на трошоците, а American Airlines веќе ги зголеми таксите за багаж – за 10 долари за првиот и вториот куфер, и до 150 долари за третиот.

Air New Zealand ќе го намали бројот на летови во мај и јуни и ќе ги покачи цените, додека China Eastern Airlines воведува нови доплати за гориво на домашните линии.

Слични мерки преземаат и Asiana Airlines, Delta Air Lines и JetBlue Airways, кои кратат летови, намалуваат капацитети и ги зголемуваат таксите.

Нискобуџетниот превозник easyJet предупреди на значително зголемување на загубите, додека International Airlines Group (сопственик на British Airways) засега избегнува итно поскапување благодарение на претходно обезбедени договори за гориво.

На азискиот пазар, IndiGo воведува доплати за сите летови, а Korean Air преминува во вонреден режим на работа.

Во Европа, Lufthansa ќе приземји дел од флотата, додека Turkish Airlines од 1 мај воведува привремена доплата од 10 евра по патник на линиите меѓу Турција и Европа.

United Airlines веќе ги намалува непрофитабилните линии, очекувајќи цените на нафтата да останат високи и во наредните години, додека канадскиот WestJet воведува доплати и комбинира летови за да ги намали трошоците.

Аналитичарите предупредуваат дека доколку кризата продолжи, патниците ширум светот ќе се соочат со повисоки цени, помал избор на летови и дополнителни трошоци кои веќе стануваат нов стандард во авио-сообраќајот.