Skip to content
Најмалку 20 лица се повредени, меѓу нив и две деца, во масовниот руски ракетен и дронски напад врз Киев во текот на ноќта и утрово. Бројот на повредени растеше во текот на денот, а пет лица се задржани на болничко лекување, соопшти градоначалникот Виталиј Кличко.
Русија го нападна украинскиот главен град со комбинација од ракети и беспилотни летала, а експлозии се слушале во повеќе делови од градот. Украинските власти пријавија оштетувања на цивилна инфраструктура во неколку реони на Киев.
Меѓу повредените се девојче на 10 и момче на 12 години. Во првите часови по нападот властите соопштуваа за 12, потоа за 16 и 18 повредени, пред бројката до пладне да се зголеми на 20.
Оштетени се станбени згради, образовни објекти, деловни простории, магацини, бензинска станица, автомобили и железничка инфраструктура. Штети се регистрирани во повеќе делови на Киев, меѓу кои Днипровски, Дарницки, Соломјански и Подилски реон.
Во Днипровскиот реон биле оштетени станбена и деловна зграда, како и прозорци на околните објекти. Во Соломјанскиот реон бил погоден магацин, додека последиците од нападот биле регистрирани и на други локации низ главниот град.
Нападот врз Киев бил дел од поширок руски воздушен напад врз Украина. Reuters објави дека Русија употребила балистички и крстосувачки ракети и речиси 160 дронови, а штети и повредени биле пријавени во најмалку осум региони.
Во Одеса биле повредени шест лица, додека во Запорожје уште три лица биле повредени при напад врз индустриски објекти. Погодена била и енергетска инфраструктура во други делови од земјата.
Украинската противвоздушна одбрана соопшти дека пресретнала или електронски неутрализирала 131 воздушна цел за време на нападите. Москва, пак, соопшти дека нејзините сили напаѓале украинска индустриска и транспортна инфраструктура.
Нападот доаѓа по серија интензивни руски воздушни удари врз Киев и други украински градови во изминатите недели, додека дипломатските напори за запирање на војната остануваат без конкретен пробив.
