Skip to content
Карлос Алкарас ќе мора да направи подолга пауза од тениските терени поради повреда на рачниот зглоб, што го исфрла од еден од најважните делови на сезоната на земјена подлога. Шпанскиот тенисер ќе ги пропушти турнирите во Рим и Ролан Гарос, откако претходно се повлече од Барселона и од Мадрид.
Повредата ја заработи на турнирот во Барселона, каде во првото коло го совлада Ото Виртанен, но подоцнежните лекарски прегледи покажале дека проблемот е посериозен од првичните очекувања. Алкарас тогаш изјави дека мора да го слуша своето тело за повредата да не остави последици во иднина.
По новите тестирања, од неговиот тим било одлучено најразумен чекор да биде претпазливост и повлекување од Рим и од Ролан Гарос. Алкарас соопшти дека периодот е тежок за него, но дека очекува да се врати посилен, откако ќе се процени како ќе напредува закрепнувањето.
По веста за откажувањата се огласи и неговиот кондиционен тренер Алберто Љедо Килес, кој порача дека тимот нема намера оваа пауза да ја гледа како пораз. Тој напиша дека тешките моменти се дел од патувањето и дека кога ќе се појави пречка, постојат две опции: да дозволиш да те собори или да ја искористиш. „Ние ја избравме втората опција“, порача Љедо Килес.
Засега не е прецизирано колку точно ќе трае отсуството на Алкарас од терените. Неговиот тим најавува внимателен пристап, со цел да се избегне влошување или повторување на повредата, особено затоа што станува збор за рачен зглоб, еден од најчувствителните делови за тенисер кој игра со високо темпо и силни удари.
Отсуството од Ролан Гарос е голем удар за Шпанецот, кој требаше да ја брани титулата во Париз. Главниот турнир на Ролан Гарос започнува на 24 мај, а без Алкарас се менува и сликата на фаворитите во машкиот дел од ждрепката.
Во досегашниот дел од сезоната Алкарас има скор 22-3 и веќе освои две титули, на Австралија опен и во Доха. Поради повредата, неговиот календар сега останува отворен, а следниот чекор ќе зависи од медицинските проценки и од тоа како ќе реагира зглобот во процесот на рехабилитација.