Skip to content
Американски борбени авиони Ф-16 пресретнаа две цивилни летала кои влегле во привремено забранетиот воздушен простор над Бедминстер во Њу Џерси, додека американскиот претседател Доналд Трамп престојувал во својот голф-клуб и следел турнир.
Северноамериканската команда за воздушно-космичка одбрана, НОРАД, соопшти дека двата авиона од општата авијација биле безбедно пресретнати и изведени надвор од ограничената зона. Засега нема информации дека леталата претставувале непосредна безбедносна закана.
НОРАД не соопшти дали пилотите по грешка влегле во забранетиот простор, наведувајќи дека утврдувањето на причините е во надлежност на Федералната управа за воздухопловство на САД. Пилотите претходно биле предупредени дека за време на престојот на претседателот во регионот важат привремени ограничувања на летањето.
Според информациите објавени во американските медиуми, во текот на денот бил регистриран и трет инцидент со цивилен авион. Леталото повторно воспоставило комуникација и ги следело инструкциите пред да биде потребно директно пресретнување од борбените авиони. Инцидентот наводно го одложил заминувањето на Трамп од областа за околу 13 минути.
Трамп во неделата присуствуваше на турнирот LIV Golf во својот комплекс во Бедминстер, а токму поради присуството на американскиот претседател Федералната управа за воздухопловство вовела посебен режим на летање во околината.
Ваквите привремени забрани се стандардна безбедносна процедура при движењето и престојот на американскиот претседател. НОРАД повторно ги повика пилотите пред полетување да ги проверуваат важечките известувања за ограничувањата во воздушниот простор.
