Ќе има ли нови разговори со Иран веќе во следните два дена?

Нови разговори со Иран би можеле да се случат веќе во следните два дена, изјави американскиот претседател Доналд Трамп, според интервју за „Њујорк пост“, при што како можна локација повторно се споменува Исламабад. Најавата доаѓа само неколку дена по првата директна рунда преговори меѓу американска и иранска делегација во Пакистан, која заврши без договор, но и без целосен прекин на дипломатскиот канал.

Засега, сепак, најважниот збор е „може“. И покрај оптимизмот на Трамп, нема конечен датум, а американските власти во моментот на објавувањето не дале официјална потврда за нова средба. Ројтерс, повикувајќи се на пакистански и ирански извори, објави дека предлог за враќање на делегациите во Исламабад веќе е испратен до Вашингтон и Техеран, но дека термин сè уште не е финализиран. Дел од изворите зборуваат за крајот на оваа недела, а дел оставаат простор разговорите да се поместат и кон почетокот на следната.

Она што е јасно е дека влогот е многу поголем од самата средба. Претходната рунда, која траеше 21 час, пропадна без пробив, а спорните точки останаа исти: иранската нуклеарна програма, санкциите и контролата врз Ормутскиот теснец. Во меѓувреме, САД ја засилија блокадата на иранските пристаништа, Иран продолжи со закани за одговор, а економскиот и безбедносниот притисок врз регионот дополнително порасна. Токму затоа евентуалната нова рунда не се чита како знак дека договорот е близу, туку дека ниту една страна сè уште не сака целосно да ја затвори вратата за преговори.

Во прилог на тоа оди и оценката на генералниот секретар на Обединетите нации, Антонио Гутереш, кој изјави дека е „многу веројатно“ разговорите да продолжат. Тоа засега е и најреалната слика: постои политичка волја процесот да не згасне, Пакистан се обидува да ја задржи улогата на посредник, но сè уште нема цврста потврда кога точно би се одржала новата средба, ниту дали таа навистина ќе донесе поместување во спорот што веќе ја тресе пошироката блискоисточна рамнотежа.